Уйғурчә

Радиони бу йәрдин аңлиялайсиз

яки

Биз өткән дәристә қан аққузулмиса гунаниң кәчүрүм болмайдиғанлиғини көрүп өттуқ. «Кона келишим» заманида Худа Өз хәлқидин гуналири үчүн қоза қурванлиқ қилишини тәләп қилатти. Қоза уларниң гуналири үчүн өлгәчкә, уларниң гуналири кәчүрүм болатти.

Бу бизниңму өз гуналиримиз үчүн қоза қурванлиқ қилишимиздин дерәк берәмду? Яқ. Худа һазир бизниң бундақ қилишимизни халимайду. У бизниң биз үчүн аллибурун тәйярлиған Қозисини, йәни Рәб Әйсани тонушимизни халайду. У бизгә мундақ дәйду: «Қараңлар, дунияниң гунайини Өз үстигә алғучи Худаниң Қозисиға».

Бизниң гуналиримиз үчүн өлгән қурванлиқ аллиқачан тәғдим қилинип болди. Һәзрити Әйса Худаниң Қозиси аллибурун бизниң гунайимиз үчүн азап чекип өлди. Муқәддәс Китапта мундақ хатирлиниду: «У силәрниң ғәм қайғуңларни Өз үстигә алди, биз тартидиған азапларни У тартти… Бизниң гуналиримиз үчүн У зәхимләнди, камчилиқлиримиз үчүн У таяқ йеди. У тартқан ж,азаниң орниға биз шипа таптуқ, йегән тайиғи төләмигә биз дава таптуқ» (Йәшая 53:4-5)

Һәзрити Әйсаниң бизниң гуналиримиз үчүн азап чекип өлгәнлигини, Униң өлүми арқилиқ сиз шипа тепип сақайғанлиғиңизни, йәни гуналириңизниң кәчүрүм болғанлиғини һәқиқий чүшәнгичә бу айәтни қайта-қайта оқуп чиқиң. Һәзрити Әйсаниң бу дунияниң кишилири үчүн өлгәнлигини билишниң Өзила купайә әмәс, сиз йәни Униң сизниң гунайиңиз үчүнму өлгәнлигини билишиңиз керәк. Сиз Униңға ишиниш билән бир вақитта йәнә Униң сизниң гунайиңиз үчүн өлгән қурванлиқ екәнлигиниму қобул қилишиңиз керәк.

«Кона келишим» заманидики кишиләр қурванлиқ қилинидиған қойға чоқум қолини тәккүзүп, өзиниң қурванлиқ қилинидиған қой билән бир екәнлигини ипадиләтти. Охшашла бизму чоқум ишәнчимиз билән Худаниң Қозиси болған Һәзрити Әйсаниң бизниң гуналиримиз орнида, биз үчүн азап чекип өлгәнлигигә ишинишимиз керәк вә Уни Қутқазғучимиз дәп қобул қилишимиз керәк.

Жуқуриқи айәтни қайта қайта оқуп чиқиң. Һәзрити Әйсаниң сизниң гуналириңиз үчүн өлгән камчилиқсиз қурванлиқ екәнлигини ишәнч билән қобул қилиң һәм Униң сизниң гуналириңиз үчүн өлгәнлигигә рәхмәт ейтиң.

© 2014-2021 Әйса