Әзиз қериндашлар,
Емаюс йезисиға кетиватқан икки шагиртниң вақиәси бизгә интайин чоң роһий савақ бериду. Улар үмүтсизликкә чүшкән еди. Улар Әйсаниң Мәсиһ екәнлигигә ишәнгән, лекин Униң чапраста өлүши билән барлиқ үмүтлириниң йоқ болғанлиғини ойлиған еди. Шуңа улар қайғу, гуман вә чүшкүнлүк ичидә йол меңип кетивататти.
Бирақ дәл шу чағда тирилгән һәзрити Әйса уларниң йениға келип, улар билән биллә маңди. Улар Уни көргән болсиму, тоналмиди. Бу бизгә шуни көрситидуки, бәзи вақитларда Рәббимиз бизгә әң йеқин турсиму, дәрдимиз, қайғумиз яки гуманлиримиз түпәйли Уни тонуялмай қалимиз.
Һәзрити Әйса улардин:
«Немә тоғрилиқ сөзлишиватисиләр?» дәп сориди.
Рәббимиз уларниң әһвалини биләтти, лекин уларниң қәлбини ечишини халиди. Бүгүнки күндиму Әйса бизниң дәрдимизни билиду, амма Униң алдиға келип, қәлбимизни төкүшимизни халайду.
Андин Әйса Муса вә барлиқ пәйғәмбәрләрниң язмилиридин башлап, Өзи һәққидә йезилған һәқиқәтләрни чүшәндүрди. Униң сөзи уларниң қәлбигә йетип барди. Кейин улар:
«У йолда биз билән сөзләшкәндә қәлбимиз гоя оттәк янмидиму?» дәп ейтти.
Худаниң сөзи қәлбни өзгәртидиған күчкә игә. Инсанниң роһини тирилдүридиған, үмүт беридиған вә көзлирини ачидиған Худаниң сөзидур. Шуңа биз һәр күни Муқәддәс Язмиларни оқушқа вә униң үстидә ойлинишқа муһтаҗмиз.
Шагиртлар Әйсани өйлиригә тәклип қилди:
«Биз билән биллә қонуп қелиң» деди.
Рәббимиз уларниң тәкливини қобул қилди. Бу бизгә шуни үгитидуки, Әйса Мәсиһни һаятимизниң һәр саһәсигә тәклип қилишимиз керәк. Рәббимиз тәклип қилинған йәрдә болиду вә Өз һозурини көрситиду.
Нан уштулғанда уларниң көзлири ечилди вә улар Әйсани тонуди. Шуниң билән уларниң қайғуси шатлиққа, гумани ишәнчкә, үмүтсизлиги үмүткә айланди.
Бүгүнки күндә бизму бәзи вақитларда Емаюс йолида меңиватқан шагиртларға охшап қалимиз. Қийинчилиқлар, синақлар вә җавапсиз соаллар арисида үмүтсизлинип кетишимиз мүмкин. Лекин тирилгән Әйса бүгүнму биз билән биллә маңмақта. Униң сөзи қәлбимизни қизитиду, Униң һозури көзлиримизни ачиду вә Униң һәқиқити бизгә йеңи күч бериду.
Шуңа қериндашлар, Рәббимизниң сөзигә қулақ салайли, Униң һозурида қелайли вә һәр күни:
«Әй Рәббим, биз билән биллә болғайсән!» дәп дуа қилайли.
Амин.
