Худа хәлиқләрни Өз йолиға чақириду

Келиңлар, әй чаңқиғанлар, су ичивелиңлар,

Келиңлар, әй йоқсуллар, нәрсә елип йәңләр,

Мәйли шарап елиңлар яки сүт елиңлар,

Һечқандақ һәқ төлимәйсиләр, һәммиси һәқсиздур.

2 Немә үчүн қувәтсиз йемәкликләрни сетивалисиләр?

Немә үчүн җапа-мәшәқәттә тапқан пулуңларни силәрни қанаәтләндүрәлмәйдиған нәрсиләргә орунсиз сәрип қилисиләр?

Силәр сөзүмгә диққәт билән қулақ селиңлар,

Шундақ қилсаңлар яхши йемәкликләрни йегән болисиләр, көңлүңлар тоқ туриду.

3 Гепимгә қулақ селип, йенимға келиңлар,

Аңлаңлар, шундақ қилғандила һәқиқий һаятлиққа егә болисиләр.

Мән силәр билән мәңгүлүк келишим түзимән,

Мән Давутқа ата қилған мәңгүлүк муһәббитимни силәргиму ата қилимән.

4 Бәрһәқ, Мән Давутни әлләрниң алдида һөкүмран вә йетәкчи сәрдар қилип,

У арқилиқ күч-қудритимни нурғун әлләргә намайән қилдим.

5 Силәр өзәңлар тонумайдиған әлләрни чақирисиләр,

Силәрни тонумайдиған әлләр қешиңларға жүгрәп келиду,

Чүнки Мән, исраилларни таллиған муқәддәс Пәрвәрдигариңлар Худа,

Силәргә шан-шәрәп ата қилимән».

6 Пурсәтни чиң тутуп Пәрвәрдигарни издигин,

У йениңдики вақтида пурсәтни тутуп Униңға йелинғин.

7 Яман адәмләр яманлиқ қилиштин тохтисун,

Гунакар адәмләр яман нийәтлиридин янсун,

Улар Пәрвәрдигаримизниң йолиға қайтсун,

Пәрвәрдигар уларға рәһимдиллик көрситиду.

Улар Худаниң йолиға қайтсун,

Әпучан Худайимиз уларниң гуналирини кәчүриду.

8 Пәрвәрдигар мундақ дәйду:

«Силәрниң ой-пикриңлар Мениң ой-пикрим әмәс,

Силәрниң йолуңлар Мениң йолум әмәс.

9 Асман йәрдин шунчә жуқури болғинидәк,

Мениң йолумму, Мениң ой-пикирлиримму,

Силәрниңкидин шунчә жуқуридур.

10 Қар-ямғур асмандин яғиду,

Лекин у һәргизму асманға қайтип кәтмәйду,

Бәлки йәр-зиминни суғириду.

Буниң билән йәр-зиминдики өсүмлүкләр өсүп йетилиду,

Терийдиғанларға уруқ болиду,

Йәйдиғанларға ашлиқ болиду.

11 Худди шуниңға охшаш, Мениң ағзимдин чиққан сөзму

Һәргиз бекардин-бекар қайтип кәтмәйду.

Әксичә Мениң ирадәм сөзлирим арқилиқ вуҗутқа чиқиду,

Мениң барлиқ мәхсәтлирим шу арқилиқ әмәлгә ашиду.

12 Силәр шат-хорамлиқ билән йолға чиқип,

Аман-есәнлик ичидә йетәклинисиләр.

Алдиңлардики тағ-даванлар силәр үчүн тәнтәнә қилишиду,

Далалардики дәл-дәрәқләрму силәргә чавак чалиду.

13 Тикәнликләр орниға кипарислар өсүп чиқиду,

Оғри тикәнләр орниға қариғай дәрәқлири үнүп чиқиду.

Мана буларниң һәммиси Пәрвәрдигарниң намиға

Мәңгү шан-шәрәп кәлтүридиған бәлгүдур».

There are no articles to display here.

Article Мақалә архиви

Худа хәлиқләрни Өз йолиға чақириду